viernes, 30 de enero de 2015

DON QUIJOTE

O vinte e nove de xaneiro, a compañía teatral Neus Oliver levou a cabo a representación da obra Don Quijote no Salón Rosalía de Castro. Unha representación que destacou polo seu dinamismo, pola participación conxunta de actores e público e polo achegamento dunha obra literaria clásica ao alumnado.
A proximidade dos actores tamén é moi destacable pois mantiveron co público alí presente un diálogo  moi enriquecedor e que deu mostra da realidade do traballo teatral.


martes, 20 de enero de 2015

CAMPO LAMEIRO

O alumnado de 2º ESO visitou o Parque Arqueolóxico da Arte Rupestre de Campo Lameiro onde puido observar os deseños xeométricos e naturalistas propios dos petróglifos galegos, acceder á recreación dun poboado da Idade do Bronce para aproximarse aos modos de vida da época e visitar a exposición estable. 
A orixe da actividade extraescolar atópase en Cartas de inverno de Agustín Paz Andrade, obra de lectura común na materia de Lingua Galega e Literatura:
   Resulta que no cacho de parede que hai enriba da porta de cada un dos cuartos de arriba, sobresaíndo sobre os ladrillos, atopamos unha pequena laxe de granito, cunha figura gravada, distinta en cada cuarto. (...). Ademais, vistas dende a miña perspectiva, esas figuras case son unha premonición, porque lembran os petróglifos prehistóricos.

    No centro do cuarto estaba, efectivamente, a inquietante trapela de ferro. E gravado nela o enigmático labirinto de Mogor, que o meu amigo non recoñecera, pero que eu lembraba ben.
CAMPO LAMEIRO - Kizoa Movie Maker

lunes, 12 de enero de 2015

PEL DE LOBO


    Pel de lobo é unha novela de Xosé Miranda publicada pola editorial Xerais en 2002 na colección Fóra de Xogo. Narra a historia dun rapaz que marcha con seu pai a'O Incio para cazar uns lobos que están a atemorizar a poboación. Estes lobos non son normais xa que non temen a xente nin lles afectan as balas. Nesta viaxe verán como moitas historias que crían lendas se converten en realidade.
    Este libro gustoume polo ambiente de misterio e medo que transmite. Isto conségueo, tanto polo contido da narración, como pola súa estrutura xa que nalgunhas ocasións introduce un capítulo cando hai un momento crítico da historia, producindo no lector unha sensación de intriga. En canto á estrutura tamén me gustou o final, xa que aínda que queda aberto e non se sabe exactamente o que aconteceu coa rapaza, si dá pistas sobre o que puido ocorrer. Cabe destacar que, ademais de ser un libro moi entretido, trata temas moi importantes que invitan á reflexión como, por exemplo, a maneira de tratar as mulleres, coma se fosen escravas que non teñen nin voz nin voto. Faino a través das ansias de liberdade dunha rapaza que quere marchar da casa xa que ela non quere ser tratada así, ela quere ser tratada coma se fose un home. Finalmente, mostra que, a pesar de que os humanos queremos destacar sobre o resto de animais pola nosa capacidade de razoamento, hai ocasións en non pensamos e actuamos como animais, solucionando os problemas con guerras e batallas que non levan a ningunha parte.
    En conclusión, a novela Pel de lobo é interesante se o lector/a goza cos libros de misterio e medo, pero tamén se desexa pensar e reflexionar un pouco sobre temas como as desigualdades entre as persoas, principalmente entre homes e mulleres, ou a forma de actuar dos humanos.
 EMMA FARIÑAS CABO, 3º ESO

Ilustracións de EDEI OTERO CONDE