O alumnado de 1º ESO descubriu a existencia do gatipedro, un animal fantástico da fauna galega, coa lectura de "Marcelino Pardo", Os outros feirantes, de Álvaro Cunqueiro.
Nas sesións de Lingua Galega e Literatura imaxinaron un animal fantástico que podería proporcionar un beneficio ao ser humano, deseñaron o seu aspecto e, co Publisher, crearon unha tarxeta coa que agasallar neste Nadal aos seres queridos.
Tras a lectura da obra de Vicente Risco, adaptada por Eugenia Muñoz Fernández, o alumnado de 1º ESO recibiu a visita da exiptóloga que nos relatou a orixe desta obra e interesantes aspectos da época dos faraóns. Agradecementos a Eugenia, pola amena charla e pola súa xenerosidade.
Achéganse as vacacións de Nadal e a Biblioteca presenta e difunde entre a comunidade educativa dous folletos, subvencionados polo ENLG do centro, coas lecturas recomendadas para o tempo de lecer dende os departamentos de Castelán, Ciencias, Debuxo, Física, Francés, Galego, Historia e Matemáticas.
Constituídos os dous grupos do club de lectura extraescolar, con cadansúa coordinadora, que se reunirán os luns despois da comida na bilioteca, preséntase a obra seleccionada Unha presa de terra.
A aparición do cadáver dunha moza nun ascensor é o comezo desta novela de intriga e investigación. A trama policial parece estar servida; non obstante, o violento crime apenas deixa pistas que poidan actuar de fío condutor dunha arañeira chea de intrigas e sospeitosos. A detective privada que, por compromiso, se encarga do caso, colabora atipicamente coa policía, cun amor polo medio durante a investigación.
Unha presa de terra foi a narración gañadora do Premio de Novela por Entregas 2001 de La Voz de Galicia.
Establécese a seguinte fórmula de participación:
Lectura individual das entregas marcadas nas reunións.
Posta en común dos aspectos seleccionados polos membros do club (argumento, personaxes, estrutura, tema, tempo, espazo, estilo, ilustracións e relación con outros libros ou películas).
Nos idus de novembro publicamos a relación do alumnado ávido de lectura, que constituirá os cinco grupos do club Pasamos Páxina, e a convocatoria para a 1ª reunión.
Pasamos Páxina é o blog das lectoras e lectores do IES San Mamede, creado para recollermos as actividades desenvolvidas arredor da lectura nas clases de lingua, no club de lectura e na biblioteca escolar.
Saúdos lectores!